ዋትፎርድ በአስደናቂ ሁኔታ ታግሎ ነበር ነገር ግን ዳቪሰን ሳንቼዝ በ96ኛው ደቂቃ የሆርኔቶችን መረብ ማግኘት ችሏል።
ቶተንሃም ሆትስፐር በእንግሊዝ ፕሪሚየር ሊግ ምርጥ 4 ውስጥ ለመጨረስ የሚያደርገው ጥረት በዳቪንሰን ሳንቼዝ አስደናቂ የተጨማሪ ሰአት ግብ ዋትፎርድን በማሸነፍ ተጠናክሯል።
በጨዋታው ስፐርሶች የኳስ ቁጥጥር ብልጫ ቢኖራቸውም አጨራረስ ያነሳቸው የአንቶኒዮ ኮንቴ ተጫዋቾች ግብ ለማግኘት እስከ ተጨማሪ ሰአት ስድስት ደቂቃ እንዲጠብቁ ተገደዋል ፣ ከዛ ግን ኮሎምቢያዊው ተከላካይ ዴቪንሰን ሳንቼዝ ከሶን ሄንግ ሚን የተሻገረውን ቅጣት ምት አግኝቶ በጭንቅላቱ አስቆጥሯል።
ቀደም ብሎ ሰርጂዮ ሩጊይሎን በ25ኛው ደቂቃ የሞከረው ኳስ በዋትፎርዱ ግብ ጠባቂ ዳንኤል ባችማን የተመለሰ ሲሆን ሃሪ ኬን በመጀመርያ ደቂቃዎች ላይ የሞከረው ኳስ ለጥቂት ወጥቶበታል።
ከእረፍት በኋላ ባችማን ብዙ ስራ ነበረበት። ኦስትሪያዊው በ52 ደቂቃ ላይ ሉካስ ሙራ ከርቀት የሞከረውን ኳስ ያወጣ ሲሆን የሶንን የቅርብ ርቀት ሙከራም ጨዋታው ሊጠናቀቅ 19 ደቂቃ ሲቀረው አድኗል።
ሳንቼዝ ወሳኟን ጎል ያስቆጠረው በረዥም ተጨማሪ ጊዜ ውስጥ ሲሆን ይህም የሆነው በቪካሬጅ ሮድ ከተመልካቾች መካከል በደረሰ የህክምና ችግር ምክንያት በመዘግየቱ ነው።
የስፐርስ አሰልጣኝ አንቶኒዮ ኮንቴ ለስፐርስ ቲቪ እንደተናገሩት “ጨዋታው ከባድ ነበር ምክንያቱም በሚገባ በመከላከሉ ከተደራጀ ቡድን ጋር ተጫውተናል ፤ ይህን አይነት ጨዋታ ተዘጋጅተውበት ነበር ነገርግን ጨዋታውን ተቆጣጥረናል” ሲሉ ተናግረዋል። ብዙ የኳስ ቁጥጥር ነበረን እና የጎል እድሎችን ፈጥረናልን ግን የመጨረሻውን ቅብብል አምልጦናል ብዬ አስባለሁ – የተሻለ መስራት እንችላለን – እንዲሁም በዚህ አይነት ጨዋታ ጎል ቀድመህ ካስቆጠርክ ተጋጣሚህ እቅዱን መቀየር ይኖርበታል። እና ያኔ ቦታ ማግኘት ይቻላል።”
ኮንቴ ኑኖ ኤስፒሪቶ ሳንቶን በህዳር ወር ከተካ በኋላ በአሰልጣኝነት ያለመሸነፍ አጀማመሩን ወደ ስምንት ጨዋታዎች አራዝሟል። ስፐርስ አሁን በኢ.ፒ.ኤል የደረጃ ሰንጠረዥ 6ኛ ላይ ተቀምጧል ነገርግን ሁለት ጨዋታዎች ይቀሩታል ፣ አርሰናል እና ዌስትሃም አራተኛ እና 5ኛ ደረጃ ላይ ይገኛሉ።
በኢፒኤል ከህዳር 20 የጀመረው የዋትፎርድ ድል አልባ ጉዞ ቀጥሏል። የክላውዲዮ ራኒየሪ ሆርኔትስ በ13 ነጥብ ብቻ 17ኛ ደረጃ ላይ ተቀምጠዋል።
