ማንቸስተር ሲቲ አርሰናልን የማሸነፊያውን ጎል ዘግይቶ በሁለተኛው አጋማሽ ተጨማሪ ሰአት ውስጥ አስቆጥሯል። ጋብሪኤል ለሜዳው ቡድን ቀይ አይቷል!
ማንቸስተር ሲቲ በተከታታይ 11 የእንግሊዝ ፕሪሚየር ሊግ ድሎችን አስመዝግቧል። በ2022 መክፈቻ ጨዋታቸው ሮድሪ በተጨማሪ ሰአት አስቆጥሮ የ10 ተጨዋች አርሰናልን 2-1 ማሸነፍ ችለዋል።
የሚኬል አርቴታ አርሰናል የመክፈቻ ልውውጦች ላይ የተሻለ ነበር እና ከግማሽ ሰዓት በኋላ ያገኘው የ 1-0 መሪነት ይገባዋል።
ቤን ዋይት ከኬቨን ደብሩይን ነጥቆ ወደ ኪራን ቲየርኒ አሳለፈ። ተከላካዩ ቡካዮ ሳካን በሳጥኑ ውስጥ አገኘው ፣ እሱም በመጀመሪያ ጊዜ ምት የሲቲ ግብ ጠባቂው ኤደርሰንን አሳልፎ አስቆጥሮታል።
በሁለተኛው አጋማሽ ተጠናክረው የጀመሩት እንግዳዎቹ በ53ኛው ደቂቃ ላይ ግራኒት ዣካ በርናርዶ ሲልቫን ሳጥን ውስጥ ከጣለው በኋላ በቫር ፍፁም ቅጣት ምት አግኝተዋል። ሪያድ ማህሬዝ የተገኘውን ፍፁም ቅጣት ምት አሮን ራምስዴልን ሸውዶ በጥሩ ሁኔታ ግብ አድርጎታል።
ከ6 ደቂቃ በኋላ በጋብርኤል ጄሱስ ላይ በሰራው ጥፋት ተከላካዩ ጋብርኤል በቀይ ካርድ ከሜዳ ወጥቷል።
አርሰናል በቁጥር ቢበለጥም ጥሩ ተቋቁሞ ቆይቷል ፣ ነገር ግን በ93ኛው ደቂቃ ግብ ተቆጥሮበታል። የአይሜሪክ ላፖርቴ የጎል ሙከራ በተከላካዮች ቢከሽፍም ሮድሪ የተመለሰውን ኳስ አክርሮ መትቶ አስቆጥሯል።
በፔፕ ጋርዲዮላ የሚመራው ማንቸስተር ሲቲ አሁን በ11 ነጥብ ልዩነት በኢ.ፒ.ኤል. የደረጃ ሰንጠረዥ አናት ላይ ይገኛል። ቼልሲ እና ሊቨርፑል ሁለተኛ እና ሶስተኛ ሆነው በእሁድ ይጋጠማሉ። አርሰናል በአራተኛ ደረጃ ተቀምጧል አሁን ግን የለንደኑ ተቀናቃኙ ዌስትሃም ዩናይትድ እና ቶተንሃም ሆትስፐር ከስሩ ይገኛሉ።
