ቼልሲ እና ሊቨርፑል በዋና ከተማው አቻ ተለያይተዋል!

ቀያዮቹ ማኔ እና ሳላህ ባስቆጠሯቸው ሁለት ግቦች ቀዳሚ መሆን ቢችሉም ቼልሲዎች ኮቫቺች እና ፑሊሲች ባስቆጠሯቸው ግቦች ከመመራት ተነስተው አቻ መለያየት ችለዋል!

ቼልሲዎች እሁድ በስታምፎርድ ብሪጅ በተደረገው የእንግሊዝ ፕሪሚየር ሊግ (ኢ.ፒ.ኤል.) አስገራሚ ጨዋታ ከ2-0 መመራት ተነስተው ከሊቨርፑል ጋር አቻ በመውጣት ነጥብ ተጋርተዋል።

የሊቨርፑሉ አለቃ የርገን ክሎፕ በኮቪድ-19 ምክንያት በጨዋታው ላይ ሳይገኙ የቀሩ ሲሆን የቼልሲው አሰልጣኝ ቶማስ ቱቸል ደግሞ ቤልጄማዊው የ97.5 ሚ.ፓ ሪከርድ ፈራሚያቸው ሮሜሉ ሉካኩን በሰጠው አወዛጋቢ ቃለ ምልልስ ከጨዋታ ውጪ ሆነዋል።

እንግዶቹ ጨዋታውን በድምቀት የጀመሩ ሲሆን በመክፈቻው ደቂቃ በሴሳር አዝፒሊኩዌታ ላይ በሰራው ጥፋት ቢጫ ካርድ ብቻ በማግኘቱ እድለኛ የሆነው ሳዲዮ ማኔ ትሬቮህ ቻሎባህ የሰራውን ስህተት ተጠቅሞ ቀያዮቹን በ9ኛው ደቂቃ ቀዳሚ እንዲሆኑ አድርጓል።

የመሐመድ ሳላህ የግል ጥረት ሊቨርፑልን በግማሽ ሰአት ውስጥ 2-0 እንዲመራ አድርጎታል ፣ ከአሌክሳንደር አርኖልድ የተሻማለትን ኳስ በአስደናቂ ሁኔታ አስቆጥሯል።

ቼልሲዎች የመጀመርያው አጋማሽ ሊጠናቀቅ ትንሽ ደቂቃዎች ሲቀሩት ጥሩ እንቅስቃሴ ማድረግ ጀመሩ። ክርስቲያን ፑሊሲች በተጨማሪ ሰዓት የአቻነት ግብ ከማስቆጠሩ በፊት ፣ ማቲዎ ኮቫቺች በ42 ደቂቃ የአየር ላይ ኳስ በካኦኢምሂን ኬሌሄር መረብ ላይ ማሳረፍ ችሏል።

አጓጊ በሆነው ጨዋታ ሁለቱ ቡድኖች በሁለተኛው አጋማሽ የማሸነፍ እድሎችን ያገኙ ሲሆን የቼልሲው ግብ ጠባቂ ኤድዋርድ ሜንዲ የሳላህ እና ማኔ ግሩም ሙከራዎች ሲያከሽፍ ኬሌሄር ደግሞ የፑሊሲች አስደናቂ ሙከራ አድኗል።

ውጤቱ ቼልሲ (43 ነጥብ) እና ሊቨርፑል (42 ነጥብ) በቅደም ተከተል ሁለተኛ እና ሶስተኛ ደረጃ ላይ አስቀምጧቸዋል። ምንም እንኳን ቀያዮቹ ከማንቸስተር ሲቲ እና ቼልሲ ጋር ሲነፃፀሩ አንድ ጨዋታ ቢቀራቸውም የፔፕ ጋርዲዮላ ቡድን ሰማያዊዎቹን በ10 ነጥብ በልጦ የደረጃ ሰንጠረዡ አናት ላይ በመቀመጥ የሻምፒዮንነት ፉክክሩን ተቆጣጥሯል።